www.vigometropolitano.com
A voceira do Partido Popular de Redondela, Francisca Canal, presentou no pleno ordinario municipal do pasado 29 de outubro unha moción sobre a falla de servizo do tratamento do Sintrom no centro de saúde de Redondela. Por contra, a moción non se chegou a debatir porque os concelleiros do grupo popular abandoaron a sesión plenaria antes da súa finalización. O grupo popular levará, de novo, ó vindeiro pleno, este problema.
Segundo Canal son 340 os enfermos afectados por este problema "que se debe á escaseza de persoal no citado centro". A voceira popular informou mediante dita moción que, segundo se plasmou nos medios de comunicación, "o propio Sergas admite desaxustes no mencionado servizo na localidade de Redondela" e lembrou que "os mesmos medios publicaron tamén que os pacientes que precisen deste tratamento deben desprazarse agora ata o Hospital Xeral-Cíes, en Vigo".
Deste xeito, o Partido Popular quíxose facer eco das demandas dos afectados, que na súa maioría son persoas maiores que poden ver dificultado o seu acceso ó tratamento, solicitando no pleno do pasado mércores "que se lle insista ó Sergas para que consolide dito servizo no noso municipio, dotandoo de persoal se fose preciso e dos mecanismos axeitados para dar servizo ós usuarios demandantes do mesmo".
